Język / Sprache
Kategorie na blogu
Chmura tagów
Zaloguj się
Marcin Melon ô "Leanderce" Rafała Szymy 0

Ôsprowki do maszkecynio

Pamiyntōm jak za bajtla starzik abo starka brali mie na klin i napoczynali swoje ôsprowki ô downych czasach. Kej były downe czasy? Nojczynścij za Niymca (za Hitlera), abo jeszcze downij: za Kajzera, za Wilusia. Abo za zeszłyj Polski. I niy za siedmioma gōrami, ino sam, na Ślōnsku. Fest rod żech był tymu ôsprawianiu, bo miōł żech gyfil, że to sie dzioło naprowdy, kajś tukej u nos, a niy, jak to w bojkach, kaj indzij. Wiedziołech, że to sie dzioło naprowdy, nale niy były to na zicher ôsprowki ańfachowe. Zawdy na koniec było w nich cosik wiyncyj. Cosik, skuli czego człowiyk chyto sie za gowa i pado: “Richtiś? Niy godej, że ôn to zrobił?”

Jak bydziecie czytać ôsprowki Rafała Szymy to, wetna sie, niy roz bydziecie chytać sie za gowa. Bo Rafał poradzi ôsprawiać jak nojlepszy ze ślōnskich starzikōw. Tak, że żodyn niy poradzi sie pokapować, kaj je prowda, a kaj już jij niy ma. Nale jak sie zatomkocie w jego ôsprowianiu, to już wylyź niy bydziecie chcieli.

Cosik tukej niy sztimuje. Roz: Rafał Szyma to niy ma żodyn starzik, ino mody karlus. Dwa: to, ô czym Rafał ôsprawio, niy dzioło sie downo tymu, ino dzisiej rano, możno łońskigo tydnia, a możno dziepiyro zajtry sie Wom przitrefi. Egal. Sztuka ôsprawianio je uniwersalno. A mało fto poradzi ôsprawiać tak jak Szyma.

No i ta godka. Szyma jako pisorz niy konsumuje godki – ôn jōm maszkeci. Biere kōncek po kōncku i maszkeci. Jak sie go czyto, mo sie gyfil, że tyn Ślōnsk, ô kerym ôsprawio mo swōj smak, że poradzicie go powoniać, usłyszeć jego klang. Eli moga wom cosik pedzieć, to biercie te ôsprowki i maszkećcie je z Rafałym. Biercie sie je poleku, niy na gibko. Jak mocie tako chynć, to poczytejcie drugi roz. Sztopnijcie i powoniejcie ta gyszichta. Pamiyntejcie, że takich maszketōw żodyn wom niy do zaś za pora tydni. Na take cosik trzeba dugo cichtować. Na ta ksiōnżka czekali my dobre pora lot, bez kere Rafał publikowoł małe kōncki na swojim blogu i zbieroł sie na ôpowoga, coby yntliś to wydać. No i wydoł. To terozki mogymy sie pomaszkecić.

 

Przekonōł Wŏs Marcin Melōn? Sam możecie kupić "Leanderka".

Komentarze do wpisu (0)

do góry
Sklep jest w trybie podglądu
Pokaż pełną wersję strony
Sklep internetowy Shoper.pl