Zrychtowane na Gōrnym Ślōnsku
Nowŏ cecha do naszych produktōw.
R.U.R. ôd Karela Čapka we ślōnskim przekładzie ôd Mirosława Syniawy to piyrszŏ ksiōnżka, na keryj uwidzicie nowe logo: cecha “Zrychtowane na Gōrnym Ślōnsku". Uznali my, iże werci sie prōmować naszã, ślōnskõ markã w stylu "Made in…" i produkty, co ich tworzōm ślōnscy twōrcy: pisŏrze, redachtory, artysty, grafiki a durkarnie, a kere sprzedowŏ ślōnskŏ firma.
Jak my zaglōndali za gōrnoślōnskōm symbolikōm, kero by my widzieli do takij marki, widziały nōm sie inksze pōmysły jak gōrnoślōnski ôrzōł (co je fest eksploatowany). Stoli my tyż ô to, coby symbolika geltowała do cołkigo Gōrnego Ślōnska, a niy ino do industryjalnyj czyńści. Tōż na ôstatku prziszli my ku tymu projektowi:
Farbistŏ wersyjŏ
Po jakimu tak?
- Mōmy sam gōrã, choby Anaberg
- Mōmy sam rzykã, choby Ôdrã
- Mōmy sam dwie tajle, co łōnczōm sie w jedno. Choby polske i czeske ziymie Gōrnego Ślōnska. Choby te, co sōm we ślōnskim i ôpolskim wojewōdztwie. Choby Ślōnzŏki, co ôstały żyć na swojij ziymi i te, co miyszkajōm w rozmajitych strōnach świata.
- A jakby na to zaglōndać niy z boku, ino choby na ôbrŏzek 3D, mōmy drōgã, co kludzi do przodku, we prziszłość; dyć dobrõ prziszłość do naszyj ziymie, kultury i gŏdki chcymy tworzić.
To niy mŏ być certyfikat czystości, ino sygnoł, iże flyjgujymy naszã kulturã i aszymy sie tym, czym - podug nŏs - werci sie poasić. Kej ino nojważniyjsze fragmynty roboty przi produkcie bydōm rychtowane ôd Ślōnzokōw i na Gōrnym Ślōnsku, pudzie sie spodziywać “sztympla” Zrychtowane na Gōrnym Ślōnsku / Upper Silesian Product.
Posiedzicielym marki je wydŏwnictwo Silesia Progress, ale radzi sie dogōdōmy, jak fto by chcioł zgody na używanie jij tyż na swojich produktach, co sōm... narychtowane na Gōrnym Ślōnsku.
Pōmysł i graficznŏ realizacyjŏ - Rafał Szyma.
Czornŏ-biołŏ wersyjŏ
Piyrszŏ ksiōnżka ze cechōm “Zrychtowane na Gōrnym Ślōnsku”
